Usgschisse


Mit Lippestift het aues so chlei es Güüli, u für dass es würklech guet usgseht, muesch im Usgang aupott uf d Schiissi. U dert isch ging es Hueretrück vor em Spiegu. D Negu schnidsch am gschydschten o ging churz. Isch eifach gäbiger. Wo voletscht so re Bätschelerett vor loufender Kamera bim Rüebli rüschte so ne diamantbsetzti Chrauen isch abbroche, isch das an ere Nahtoderfahrig gliichcho. Drum.

O Röck treisch lieber kener, süsch müesstisch ja d Bei rasiere, u für das länggts eifach nid o no näb em Braue zupfe u Damebart leisere. Mi het ja scho gnue z tüe bir Uswaau vo de Chleider, wüu die Söcke, wo zum Fulaar würdi passe, grad ir Wösch si. Aber itz chunnts ja besser. Itze, wo das mit dene Rouen u Glischee äntlechen einisch relatiwiert wird, nid numen i der Literatur, wo vor lutter Tschenderfluidität d Füechtgebiet sy trochegleit worde, sondern o ir Mode, wo öpper zum Bruschthaar un em Schnouz no Lippestift treit. Söu eim no mau öpper cho vo wäge, Achsuhaar syg gruusig. Mi cha itze sogar Tante Fridis Dööpiess, wo me nid i Rotchrützsack tuet, wüu mes niemerem cha zuemuete u s o nid i ds Brockehuus bringt, wüus so süntetisch isch, unschiniert eifach säuber trage. Mit ere unpassende Hauschötti geit das tipptopp.

Usgschisse het men eifach uf der Schiissi. Nid nume, das men itz der Pfäffersprei o no zum Bisle mues mitnäh ganz abgseh vom stränge Grüchli, ds Trück vor em Spiegu isch no einisch gröser, wo sech hie itz Kreti u Pleti d Nase puderet. U derbii wett me ja numen eifach d Finger wäschen u so chlei unger sich sii. Zum guete Glück laht me de Froue wenigschtens d Goofe. Emu di chliine. Di mache sech haut eifach z schlächt im Zeevou.