Inhaut


Nei chumm, hör mer uf mit so Verastautige. Das isch ja so öppis vo stier. Das tönt ja genau so, wie irgend e Hundsverlochete am vieri am Namittag bi Schwarzwäuderturte u Gaffee. Wär wott scho settigs.

En Event muess es de scho si, süsch chaschs grad vergässe, dass öppe no öpper a ne Alass chiem.

När machsch es vilech no i irgend so ne re Beiz, irgendwo ir Pampa. Hallo? D Location muess scho stimme, für dass me es Publikum hinger em Ofe cha füre locke.

Hett doch da voletscht eine so nes Konzärt gäh. Säg emau. Musig lose? I wott, wenn schon, e Gig, wo so richtig performt wird. So überchunnt me de o, was me erwartet. Content, sägi da nume. Was Inhaut? Inhaut, das isch geschter gsi.

Oder nähme mer doch d Gfüeu. Läck, isch das passé mit däm Härzschmärzzüg. He, mir wei Emotione, u das nid z knapp. Muesch d Lütt berüehre, we de öppis z säge hesch – o we de gar nüt z säge hesch. Sobau Emotione chasch wecke, bisch derbi.

Das faht scho bi de Gschichte a. Di chasch nid eifach so verzeue. Scho mau öppis vo Storytelling ghört? Nid? Ja, de isch es Zit, dass di mau mit däm befassisch. So öppis mues nämlech glehrt si. Nimm zum Bischpiu Stand Up. Da ligsch itz ab im Fau.

Kes Wunger, hett da d Literatur ke Brot meh. Scho das Wort tönt so öppis vo abglöscht. Hei, du muesch d Lüt aschpräche. Weisch, was zieht? Spoken Word. Genau das isch es, wos hütt brucht. De lose plötzlech aui zue.

Was spouken?

Natürlech schribe die das uf.

Frei gredt?

Nei, di läse eifach ab.

Der Ungerschied?

Chani der itz nid grad so säge. Aber muesch zuegäh, es tönt eifach scho zimlech viu besser. Spiut im Fau nid so ne Roue, was es usseit. D Houptsach isch, es flasht.


© 2018 by stst