Ja

Nei, weisch, di lidet nid würklech. Das gseht nume so us. Di cha das nämlech, so usgseh, aus würd sis. Das isch nämlech ihre Bruef, so z tue aus ob. Di isch nämlech unger warmem Wasser gschtange. U zaut hett si o nid über drütusig Franke für di chauti Dusche. Ganz im Gägeteu. Di hett sogar no Gäut übercho für das. Für dass si itz uf jedem Schwizer Chuchitisch ligt u warm tuschet u so usgseht, aus würd si früre. Niemer macht so öppis vergäbe. Im Gägeteu. Angeri würd sech ja derfür schiniere, bi frömde Lüt blutt ufem Tisch z lige. Di würd sech o schiniere, Gäut z näh, für warm z dusche. Di würde zahle derfür, dass si öppis überchiem, wo ne ds Läbe agnähm macht. Wüu si wüsse, dass aues si Pris hett. Aber o die, wo di Frou, wo da warm tuschet u so tuet, aus wär ds Wasser chaut, hei zaut, wüsse, dass aus si Pris hett. Was zum Bischpiu so ne Gratiszitig uf jedem Schwizer Chuchitisch choschtet. U dass sech das rächnet. Wüu meh aus d Häufti vo de Schwizer Lütt itz gloube, dass di Frou für ihri chauti Dusche über drütusig Schtutz hett zaut. U de rächne si sech us, dass es Nei se auso viu biuiger chunnt u si eso witerhin u jederzit schön warm chöi tusche. U scho geit di Rächnig uf für die, wo di Frou, wo da warm tuschet u so tuet, aus wär ds Wasser chaut, hei zaut, u nid nume die zaut hei, sondern o di ganze Zitige, wo itz e zitlang uf aune Chuchitische lige u meh aus nume grad di Frou aus fautsches Biud vermittle. Wüu gäge das, wo für seie useluegt, we di ganzi Schwiz witerhin biuig warm tuschet, isch di blutti Frou u das Blettli i jedi Hushautig es Nasewasser. Dene mögt me e chauti Dusche emu uf jede Fau gönne.