Fouge

Är hett seie itz mängisch eifach e chli la rede, vor auem denn, we si sech grad wider so furchbar hett möge ergeuschtere über öppis, wo ihre a ihm nid passt hett, u si drum hett afa usehöische u um ds Verrode hett wöue Rächt ha. Oder hett wöue, dass är öppis angers macht, aus eso, win är das ging gmacht hett. Er hett eifach zueglost u ja, ja gseit u re uf ke Art u Wis widerschproche, eifach em Fride z lieb u ihrer Parnerschaft.

Ihre hett das irgendwie no gfaue, dass sie wäg settigem nie hei Krach gha. Aber mängisch hett se de scho ds Gfüeu beschliche, er nähm se äuä nid ganz ärnscht u dänki für sech: Red du nume. Wüu är se zwar ging hett la rede, de aber glich witerhin aus eso gmacht hett, wie ärs ging gmacht hett, o wenn er ja ghört hett gha, dass sie das lieber angers wett. Aber si hetts de la si, über das itz o no afa z rede.

Bis si du ame ne schöne Tag isch mit em Hung ungerwägs gsi. Was ja eigentlech nüt Ussergwöhnlechs wär gsi. Schpezieu isch gsi, dass o är derbi isch gsi, sie aber em Hung hett gseit, är söu dahäre cho. Normalerwis isch ärs gsi, wo ihm grüeft hett. Normalerwis isch der Hung o ging grad sofort cho, we me ihm grüeft hett. Aber a däm Tag isch er witer gloffe u hett nid emau gross umegluegt, o wo sie ihm ds zwöite Mau hett befohle, z warte. Är isch dervo glaueret u hett dert gschnüflet, wos ihm grad passt hett. Hett eifach gmacht, was är hett wöue. Das isch ere irgendwie bekannt vorcho. Red du nume, hett dä äuä dänkt. Emu seie hett das tünkt, we si ihm so zuegluegt hett, wie är demonschtrativ nid hett möge fouge. Der Ma uf der angere Schtrassesite hett nume i si Bart ine gschmunzlet. Das hett se de no ds Toupet dünkt.

Vo denn a hett sis mit däm Hung ganz angers gmacht. Hett nume no üsserscht outoritär verhandlet, wes isch drufab cho. Hett weni gseit, derfür mit em richtige Nachdruck. So dass der Hung hett gmerkt, dass es ärnscht giut. U ungereinisch ischs de wider gange mit däm Fouge. U es isch nid lang gange, hetts du o mit em Ma wider e chli besser klappet.