Fernseh

Sie si no ke Haubschtung gloffe gsi, zersch aui di Schtägli uf dür ds verwinklete Dorf u de när am Bärgwäg nah, em Waud zue, wo sie z erschte Mau mues verschnufe u der Pulli abzieh. Der Wäg isch schtotzig, es isch no früeh, aber d Sunne bränntet scho zimlech.

Bim nächschte Schteihüttli, wo si dran verbi chöme, schteit a der Huswang, am Schärme unger der höuzige Loube, en aute Fernseh ufem Bänkli. So eine, wo fasch töifer isch aus breit, so eine, wo scho lengschtens niemer meh brucht.

U so, wi aui Sache, wo me hie nümm brucht, aber viu z schperrig si, für zum Container abe z bringe, schteut me o so ne Fernseh mau zersch voruse. Irgend einisch würd me ne de scho i ds Dorf abe trage, schliesslech chunnt zwöi Mau im Jahr d Schperrguetabfuehr. U faus me der Termin sött verpasse, schteut me ne de ds Jahr druf haut efange hinger ds Hus – vilech i der Hoffnig, är vermoderi de irgendeinisch, was bi some ne Fernseh ja zwar ender unwahrschinlech isch. Aber ds Gjätt u d Brombeeri wärde ne zu sech näh, so dass das Grät de eines Tages eifach wird verschwunde si u me sech nid brucht d Müeh z mache, ne der ganz Wäg i ds Dorf abe z schleipfe.

Aber das aues cha ihne ja eigentlech gliich si. Drum wandere si witer, em Bärgsee u em Gipfu zue. D Fernsicht hett se meh interessiert, aus so ne aute Fernseh.

Wo si du, zimlech erschöpft, gäge Abe vom Bärg obenabe wider däm Hüttli zue chöme, ghöre si scho vo witem so Lütt, wo holeie u singe. Es tönt wie nes mittugrosses Fescht, was zimlech schpezieu isch, hie am schteile Hang u no feiechli wit ewägg vom Dörfli. Vorem Hus usse gseh si du aber nume grad vier Manne. Zwe hocke uf schiefe Garteschtüeu, eine ligt im Gras u der viert schteit im Türrahme. Aui hei es Bier ir Hang u luege i di gliichi Richtig. I die Richtig, wo das Gholei här chunnt. Das chunnt nämlech us däm Fernseh. U dä Fernseh, dä louft. Es louft Schutte. Auem a e interessante Mätsch.

So isch das auso mit däm Grät dert vor däm Hüttli uf der abglägne Aup, hei si gmerkt. Das isch meh aus e aute Fernseh, wo nümme brucht wird. Das isch Public Viewing i de Bärge.