verchleidet


De hocket si auso de wider irgendeinisch i irgend so re Schtadt uf irgend eme ne Perron a irgend so mene Bahnhof uf irgend so mene chaute Gitterbank u wartet uf irgend e Zug, wo irgeneinisch sött cho, we nid i füf Minute, so doch de sicher ire Haubschtung oder so. Der Hung, wo wi ging i so Situatione, uf ihrem Fuess hocket, frührt glich a ds Füdle u schlotteret.

Vilech ischs nid nume wäge der Cheuti.

I der Schtadt hei si nämlech Fasnacht, u i der grosse Haue ischs drum no lüter aus süsch. Ufem Perron isch es ruhiger.

Da chunnt eine cho z loufe, nümm ganz eso grad, u laht sech näb se ufe Bank la plumpse. Är schmöckt no schlimmer aus er usgseht. Sogar der Hung rütscht chli uf d Site.

Kunschtfaserplüsch isch no nie ihre Fau gsi. U i Sache Transchpiration itz o nid grad der Renner. Sis Länghaar-Ganzkörperkoschtüm hett eidütig scho besseri Zite gseh, so wie der Typ säuber äuä o. Nume är hett gloub z Gfüeu, hütt sig e schpezieu guete Tag, so wi ner vor sech häre grinset.

A sim versiffte Kunschtpeuz, wo einisch vilech Gäub isch gsi, chläbe nassi Konfetti, u si schpitzig Voguschnabu hett er sech uf d Schtirne ufe gschobe, chli schief, so dass er usgseht, wie nes schlächt designts Eihorn. Ds Elastig schnidt i siner Backe u macht us zwone vier. E himutruuregi Verchleidig aus i auem.

Är aber hetts luschtig, zäme mit sire Büchse Bier, was ihm aber ungereinisch nümme längt, u är wachst über sis Säubschtgschpräch use.

Ob si de nid a d Fasnacht göng? Si heig ja gar kes Koschtüm.

Süsch gsei sie ganz angers us, seit si zu ihm u suecht uf ihrem Handy es Föteli vor Claudia Schiffer. Mou, meint er u luegt se a. Mi kenn se itze würklech nümm. När brucht er wider e Pouse u ne Schluck us sire Büchse. Derbi chunnt ihm äuä di nächschti Frag i Sinn.

U de der Hung, ob dä o mit müess?

Wele Hung?, fragt sie ne da. Das sig ihre Ma, dä sig e Meischter im Verchleide.

Itz ischs wider lenger schtiu u d Büchse lär wies usgseht.

De wöug är nümme lenger schtöre, macht er de – u geit.