Bianchi

Niid isch gar nid ihres Ding gsi. Sie hett eigentlech aues aune möge gönne. Ussert öppisem, u we ihre öpper plötzlech mit genau so eim begägnet isch, wo sie o so gärn hätt wöue, de hett sie sech scho jedes Mau chli gfragt, warum usgrächnet är u nid sie so öppis heigi.

O Schtäle isch nid Ihres gsi. Süsch hätt so vilech eini vo dene grosse Zange gchouft, wo me ganz ring Chöttine u Kabu cha dürtrenne. U hätt sech eifach gnoh, was öpper angerem hett ghört, aber i ihrne Ouge scho lang ihres hätti söue si.

Verliebt hett si sech äua scho i ihrer Jugend, irgendwo z Italie. Ganz sicher isches Liebi ufe erscht Blick gsi, e Liebi, wo i au dene Jahr nume ging gwachse isch u scho fasch zur Besässeheit isch worde. U wüu se d Erfahrig das hett glehrt, hett si o gwüsst, dass so ne Jugendliebi di schlimmschti isch. Eini, wo se nie wird loslah, bis si se nid hett chönne usläbe u abhäggle.

U de isch dä Troum du griifbar worde. Im Schoufänschter hett si ne gseh u isch i dä Lade ine gange. D Grössi isch perfekt gsi. D Farb sowieso u der Rahme chli lädiert. Aber auti Liebi roschtet ja nid. Es paar Sache hett me müesse apasse – gäge ne chlinere Ufpriis. U so hett si Gäut usgäh, wo si eigentlech gar nid gha hett, oder für Wichtigers hätt müesse schpare. Aber Tröim si no nie biuig gsi, u itz hetts eifach müesse si. Wüu so ne Glägeheit sech vermuetlech im Läbe nid zwöimau würdi biete.

Ohni Chappe u Häntsche isch si du dür d Bise heizue mit ihm. U dass si da derbi hett müesse lide, hett si ihm nid übu gno. Si hetts när o nid über ds Härz bracht, ihri Eroberig i Chäuer abe z schteue u hett se churzerhand di zwo Schtäge i d Wohnig ufe treit, so dass si se der ganz Tag ging wider ganz verliebt hett chönne aluege.

Är hett ab au däm nume der Chopf gschüttlet. Mit so Sache hett er nüt chönne afah. U wo si du am Abe im Verbigang mit em Finger ganz zärtlech über das türkisfarbige Metau isch gfahre, hett er nume gmeint, är chönn süsch o ufem Sofa schlafe, faus si ihres Velo o no grad wöug i ds Bett näh.