Schtäge

Si hett no nid so lang hie i dere Wohnig gwohnt, aber lang gnue, für sech a die beide Schtäge z gwane u dra, dass me vom Wohnzimmer us nid eifach use i Garte cha, sondern e Baukon hett, für d Sunne z gniesse. So sig das äbe, i der Schtadt, hett si tänkt. U dass si eigentlech ganz zfride sig mit dere Loge, wo zäntrau u glich rächt ruhig gläge sigi. U das zu so me ne guete Priis. Da nähm me so Schtäge doch no so gärn i Chouf.

So hett sie d Iichöif ufetreit u der Küdersack abe, der Liechtschauter im Schtägehus im Fiischtere gfunge, ohni uf Nachbars Lütti z drücke u ging dra tänkt, der Schlüssu mitznäh, wüu sech d Iigangstüre nämlech vo säuber bschlosse hett. Di Schtäge, so hett si no witer tänkt, sig ja eigentlech o guet für d Fitness, so mängisch wie si am Tag usem Hus u wider hei gieng. Lift hetts nämlech kene gha. U gli hett sie o gar ke Liecht meh brucht u di zwo Schtäge blinglige chönne näh. Ufe oder abe, das hett gar ke Roue gschpiut. Sächzäh Tritte liecht um d Kurve, es chliises Bödeli, de no einisch sächzäh, u scho isch me dobe oder dunger gsi. So schnäu göng das äbe mit em Outomatismus. O das hett si tänkt.

U hett du di erschti Wösch überta dunger im Chäuer, wo me sech hett müesse iitrage, für dass me d Maschine hett chönne bruche. O a das chönn me sech gwane, hett si tänkt. Das sig ja nume chlei e Frag vor Planig. Gli göng de o das ganz outomatisch.

Wo si du mit em Wöschchorb d Schtäge uf gjuflet isch, sächzäh Tritte liecht um d Kurve, ds Bödeli, nomau sächzäh u när zur Tür i, hett si scho chli gschtutzet.

Si hett ja no nid so lang i dere Wohnig gwohnt, aber lang gnue, für z wüsse, dass es dert ke rote Teppich hett u ke Garderobe uf der rächte Site. Gschmöckt hetts o chli komisch. Si hett es Zitli brucht, bis sis hett begriffe. U hingertsi wider use isch, liisli d Türe hett zue tah u lut hett afa lache. När isch si di letschte sächzäh Tritte zdüruf. Das mit em Outomatismus sig äuä nid i jedem Fau e gueti Sach, hett si itze tänkt. Oder emu denn nid, we me usem Chäuer chöm.