Oh du


D Wiehnachte isch vor der Tür gschtange u pünktlech, wie jedes Jahr um die Zit hei sech o siner Bandschibe bi ihm gmäudet. Di Medikamänt, wo är vom Dokter übercho u hampfelewis am Morge, am Mittag, zum Znacht u vor em i ds Bett gah hett zue sech gnoh, hei Mitti Dezämber nüt meh wöue nütze. Ging rumpusuuriger isch er worde u hett du einisch, ame ne näblige graue Tag, zimlech unghoblet zu ihre gseit, itz heig ers de langsam gha mit dene Chügeli, Saubine u Tröpfli, wo sie aus Auternative hett im Sortimänt gha. So hett si de haut di Schüsslersauz wider zrugg i ds Schäftli ta u isch beleidiget usem Zimmer. Si Tee hett er o grad säuber chönne mache. D Schtimmig isch nid würklech eso gsi, wi sech das für di besinnlechi Adväntszit hätti ghört, u we o nume öpper öppis vo Wiehnachte gseit hett, de isch si Luun no schlechter worde. Di ganzi Sach mit dene Familieschlüüch, Gschänkli u au dene Erwartige isch ihm so öppis vo ufe Sack, dass är chrampfhaft nach eme Wäg hett gsuecht, sech dere ganze Sach uf eleganti Art u Wis z entzieh.

När isch er du wider zum Dokter u hett däm gseit, är hautis itze nümme us. Dass sie itz aues müessi mache, u är sig zu nüt angerem meh im Schtang, aus nume no im Bett oder ufem Sofa ume z lige. Fiume chönn är itz de kener meh gseh u läse mög er o nümm. Itz müess öppis gah, süsch träi är no düre. Em Dokter hett das iglüchtet, u er hett ne im Schpitau agmäudet. Die hei ne agluegt u ihm die Operation vorgschlage, wo vilech würdi häufe. Am Dreiäzwänzigschte sigi grad no e Termin frei. Vo denn a ischs ihm besser gange. Aui angere hei zwar gfunge, är sig de scho en Arme, usgrächnet d Wiehnachte im Schpitau müesse z verbringe. Är aber hetts gnosse, u niemer hett irgend öppis vo uhm erwartet.

Ds Jahr druf hett sie ihn de scho a der Oschtere vo aune unuswiichlech z erwartende wiehnächtleche Verpflichtige entbunde. Es isch ihm im Winter no genauso gute gange wi im Ougschte. U am vierte Advänt isch är vo sim Waudschpaziergang ganz überraschend mit eme ne Chrisascht derhär cho.


© 2018 by stst