Chagall

De si si du glich einisch i di Chiuche ine gange, wo si doch süsch nie i Chiuchene ine gö, wüu ne das nid viu seit. Itz hei si di Fänschter aber glich einisch wöue vo Nachem gseh, di Fänschter, wo süsch aui kenne, ussert dene, wo grad i der Nechi vo der Chiuche wohne.

Si hei aus Hiesigi nid emau müesse Iitritt zahle, so wi das d Turischte i ihrne Turnschue u mit de Fotoapparät ume Haus hei müesse, wo nach ihne si zur grosse Tür iicho. Nume hei ne die nüt gnützt, auso d Fotoapparät. Es isch nämlech verbote gsi, säuber Biuder z schiesse. Schliesslech hett me so Charte mit dene Sujets vo de Fänschter ja am Kiosk für tüürs Gäut chönne choufe.

Si si auso de füre u i gebührendem Abschtang adächtig vor di Fänschter gschtange u hei, wi aui angere o, ergriffe i d Höchi gluegt. D Farbe, wo dür ds Sunneliecht no besser si zur Gäutig cho, hei gschpiut mit dene Forme u Linie, u d Chraft vom künschtlerische Usdruck hett se aui drü zimlech beidruckt. Ob är äch das aues no säuber gmaut heig, oder ob ihm vilech öpper ghoufe heig, vilech der Glaser oder so, macht är itz zu sim Fründ. Grad so liisli, dass es i der Schtiui vo däm grosse Gotteshuus ke auzu grosse Kreis zieht. Är sig ja denn äuä doch scho zimlech aut gsi. Di zwe loufe witer u der Fründ faht scho afa guugle. Drüänachzgi, ghört me ne de churz drufabe chüschele. Vertöift i di Details vo dene Fänschter, gseht si plötzlech du di Ungerschrifte. Die vom Künschtler u o d Jahrzau. Aber da schteit no en angere Name. Sie louft de beide Manne nache. We me guet luegi, de gsei me das, dass är bi sim grosse Wärch heig Hiuf gha. Es schtöi ja da im Egge unger bi der Signatur, wär ihm zur Site gschtange sig. Mi müess haut eifach e chli besser luege. U de bruch me o nid ga z guugle. Schtouz seit sie itz dä Name.

Di zwe hei d Chiuche zimlech schnäu verlah, so hei si müesse lache. Sie säuber hett du ersch es paar Sekunde schpeter müesse schmunzle. Vo denn a hett si e nöie Lieblingskünschtler gha. Der Unbekannt a Chagalls Site. Der Marc Reims.