Verschpätig

Wes itze auso tatsächlech eso wär u eim d SBB – vorusgsetzt, mi hett kes GA, wüu für die, wo eis hei, gits gar nüt – müesst Gäut zrugg gä, we der Zug über ne Schtung Verschpätig hett, de chönnt me sech scho fasch afa überlege, ob me nid lieber e chli meh wetti Zug fahre u weniger gieng ga schaffe. Das chiem nämlech öppe uf ds Gliche use. Nume dass es im Zug vilech chli entschpannter wär, we me nid grad ir Schtosszit ungerwägs isch. D Schtrecki chönnt me sech ja de useläse, itz nid nume wägem Panorama. Es paar Mau Bärn – Chiasso, u mi hätt scho fei echli viu verdienet.

Itz isch aber das mit dere Rückerschtattig gnau gno ja nid ganz korrekt. Wüu, we me irgendwo häre wott u derfür lenger brucht aus me gmeint hett, so chunnt me doch glich irgendeinisch dert a. Das heisst auso, dass me di Dienschtleischtig, wo me hett gchouft, o übercho hett. I däm Sinn isch eim d SBB auso nüt schudig. Was me uf der Reis aber verlore hett, isch Zit. U da drüber müesst me itze afa nachedänke. Wüu Zit isch schliesslech Gäut.

Cha ja si, dass me nume es Zmittag verpasst hätt, das gieng ja no nid grad so a ds Läbige. Oder vilech es Konzärt. Wär eim dür d Verschpätig aber e Millionedeal dür d Lappe gange, de dörft dä Zitverluscht fasch nid z zale si. Aber was choschteti äch de es verpassts Rendez-vous? U müessti me igschparts Gäut, wo me bim Lädele nid hett usgäh, wüu d Gschäft scho hei zue gha, wo me äntlech acho isch, er SBB la zguet cho? U was passierti, we ne Fründschaft i Brüch geit ab au dere durende Unpünktlechkeit?

We me sech itz auso afaht überlege, was settegi Berächnige für ne adminischtrative Ufwand u juristischi Abklärige würde nach sech zieh, de chiem me schnäu einisch zur Vermuetig, das chöm äuä no viu türer, aus d Rückerstattige säuber. O d SBB chiem drum über churz oder läng wahrschinlech de zum Schluss, si würdi äuä besser fahre, we si afangs Jahr aune Reisende es GA schänkti. So wär letschtlech aune dienet. Vilech däm nid, mit em platzte Millionedeal. Aber dä nimmt ja sowieso der Chare.