Troume


Wo d Nadia Komanetschi nache me ne missglückte Schwümmwettbewärb ihri Mueter hett wöue erschiesse u de aber irrtümlecherwis uf seie los isch, hett si gwüsst, das me definitiv besser schlaft – vor auem aber schöner erwachet ohni settigi Tröim.

Guet füfzg Jahr isch si mittlerwile ganz guet gfahre ohni z troume – o wene re jede Psychiater itze gseit hätt, jede troumi, nume wüssi's eifach mänge nümm am Morge – uf jede Fau hett se ihres Ungerbewusste bis itze ging guet lah schlafe.

Gänderet hett das ersch, sider dass si näbe däm Ma schlaft, wo re zwar weder der Platz im Bett schtritig macht, no dür irgendweuchi Grüsch ihri Nachtrueh schtört – u gliich muess da vo däm riiche Inneläbe, wo näbe ihre schlummeret, irgend öppis zuere düre dringe. Wüu, wenn är de am Morge aube vo sine nächtleche Erläbnis u Begägnige verzeut, de dünkt es se, si heigi scho chli es längwiligs Nachtläbe. U de sehnt si sech nach Gschichte, wo äbefaus uf ene bewegti Seeu liesse lah schliesse u füre Dokter Freud e wahri Fröid wär gsi zum Düte.

Hütt am Morgen aber wird ihre bewusst, dass si doch lieber uf settegi Episode verzichtet, si die doch aues angere aus erhousam. Vor auem, we me di haubi Nacht vor ere amokloufende Kunschtturnere muess flüchte, wo scho rein brueflech im Vorteu isch, wüu si di besseri Kondition mitbringt.

Zu ihrem eigete grosse Glück hett aber d Nadia Komanetschi nid nume der Schwümmwettbewärb, sondern o no ei Arm verlore gha. So hett si das Gwehr, wo si bi sich treit hett, gar nid chönne bediene, was ihrer Mueter, aber letschtäntlech o ihre säuber z guet isch cho. Unverletzt isch si drum de äntlech us däm Troum erwachet. Chli mit Härzchlopfe u usser Atem zwar, aber süsch isch ihre nüt passiert. U Gottseidank isch da ja no dä Ma gläge, näbe ihre im Bett. Si isch necher a ne häre grütscht, u är hett se, wi das Manne eso mache, i d Arme u vor auem Böse i Schutz gnoh. Da isch si widerume froh gsi um ne. O we si äuä gar nid troumet hätti ohni ihn.

So hett äbe aues siner zwo Site, dänkt si no, träit sech uf di angeri u schlaft de wider ii.