Pablo

Der Pablo cha nid Outo fahre. Irgendwo düre fäut ihm der Blick für d Dischtanze u d Abschtäng. O ds Gfüeu für ds Tämpo irgendwie. Wes gredi geit, de freeset er, für de glii, wes um die nächschti Kurve geit, zimlech hert uf d Bräms z schtah. I de änge Gässli fahrt er im Schritttämpo, o wenn er uf beidne Site no guet Schpatzig hett. D Schteine, wo mängisch uf der Fahrbahn lige, trifft er punktgenau, u wes z schmau isch zum Chrüze, de blibt er - ganz schtiif vor Schreck - eifach schtah u wartet, bis men ihm der Wäg frei macht. Zum Glück eigentlech. Wüu wenn ers fürschi nid cha, wie söu de das ersch bim Rückwärtsfahre gah?

Nid säute muess er i de änge Haarnadukurve e haube Meter zruggsetze, wüu er der Rank nid bim erschten Alouf verwütscht. Aber das geit nid ganz problemlos. O der Gang fingt er nämlech nid ging bim erschte Alouf. I der Schtadt unger fahrt er de ging genau denn i Kreisu, we grad eine vo linggs chunnt. Dert düre hett är es Super Timing. Aber äbe.

Der Pablo cha nid Outo fahre. Was aber no lang nid heisst, dass ärs liess la si. Jede Tag hocket är a ds Schtüür. Är cha zwar nid Outo fahre, aber er darf. Das si ja schliesslech zwöi Paar Schue. U was me darf, das cha me ja mache. Das geit schliesslech niemer öppis a. Wahrschinlech isch är derbii aber nid ganz angschtfrei, u vilech hocket är grad wäge dessi so verchrampfet uf sim Fahrersitz, mit some ne tapfer entschlossene Usdruck uf sim graubleiche Gsicht. Är dänkt äuä, er zeig nes itz, au dene da uf der Schtrass, wo meine, si chönnis besser. Was ja o schtimmt, we mes genau nimmt.

Wüu der Pablo cha äbe nid Outo fahre. Was eim ja eigentlech chönnt gliich si, wenn är nid Poschtoutochauffeur wär. U nid dä Böss würdi schtüüre, wo me jede Morge nimmt, wüu me säuber zwar cha Outo fahre, sech lieber aber laht la chauffiere, wüu das viu entschpannter isch. Oder emu chönnti si.

Der Pablo hetts itz aber igseh. Gli chunnt der Winter. Es chönnt de mängisch glatt si. Drum hett är si Job hie äntlech gchündet. Itz fahri är z Züri bi de VBZ.