Gloria

Nei, si heisst nid Gloria. Aber si wird nie e Name ha, wo me sech muess merke. Einisch isch si blond, de wider brünett oder no es bitzli dunkler, ging aber hett si längi Haar, es hübsches Gsicht u ne extrem guete Luun. Nume dass dä nid viu nützt. Wüu vor rosarotem Hingergrund macht itz niemer e wüeklech gueti Faue.

Im Fau cha me bim Znacht Choche extrem guet ds iPad näbe sech la loufe, u während der Rehpfäffer so langsam vor sech nidergaret, sech uf das nid grad würklech höchschtehende Vorabeniveau abelah. Luege muess me nämlech nid, u we si de i ihrer Beiz di Pünkt vergäh, de si de o grad d Bire weich. D Chnöpfli brätle i der Pfanne. Für das brucht me ke Bunsebrönner, so wie angeri i de Chuchine vo dene Möchtegärngourmettämple. Sache gits. Mi lehrt nie us. U so chunnt eim de säuber eigenartigs Züg i Sinn. Dass me bischpiuswiis für d Hamburger ds Glettise z Hiuf chönnt näh, de wär di Hacktätschli schön beschwärt u ersch no vo beidne Site här bratet. TV gaffe macht äbe doch kreativ. Dass das süsch no keim isch i Sinn cho.

Langsam geits a ds Arichte. Ds Oug isst mit. Warum bringe si äch de ussgrächnet am Fernseh hie ging nume di zwöiti Garnitur? Aus, wo gärn Rang u Name hätt ir Schwitz, wird itz uf Hochglanz präsentiert. Aber das, wo glänzt, si nid di Lütt. Höchschtens ihri Gsichtshut. Üser Cipollatapromis hei o eifach nid ds Format, für i ihri Aalegi z passe. Aber vilech ligts ja a de Chleider. Isch ja glich. Zum Luege hett me eh ke Zit. Nume dass das, wo me ghört, o nid würklech besser isch.

Wo s de äntlech schpannend wird u eim d Gloria seit, si schteui eim itz no di nöii Flamme vom Prinz Harry vor, da luegt me itze doch lieber nümm lenger z töif i ds Gomfiglas, sondern ufe Biudschirm. Das Foto vom früsch verliebte u begehrtischte Junggseu vo Europa wird eim aber vorenthaute. Das müess me im Internet ga nacheluege. Füre Laptop hett me aber zweni Platz ir Chuchi u chläbegi Häng derzue. Aber zum Glück no eini frei, für uf das Chnöpfli z trücke. SFexit.

Mi chönnt de langsam ässe.