Verbii

Der Summer isch verbi, u du hesch das itz lang gnue so mit der umetreit. Usegschtüdelet u gwäuzt, gwärweiset u de glich wider igränkt. Bisch derfür u derwider gsi, u heschs de wider uf d Site gleit. Liechter worden isch es nid derbi, im Gägeteu. Es isch gwachsen u wachst no ging u nimmt i dim Chopf efange söfu Platz ewäg, dass es für fasch nüt meh angers längt. Itz muess das äntlech use. No bevor der Winter chunnt. Wüu dä wird o ohni das schwär gnue.

Du luegsch uf d Uhr, s isch füf ab zwöi. E Schtung. Genau söfu wosch der gä. När muess es guet si. U we nid guet, so doch de wenigschtens verbi. So wi dä Summer.

Schteusch auso dr Timer u leisch ds Telefon so ufe Tisch, dass de gsehsch, wie d Zit im Sekundetakt vergeit, nimmsch es Blatt Papier u fange mau es Bleischtift. I ds Reine schribsch es de mit Tinte. Das isch e Frag vom Schtiu. Arial oder Cambria si hie würklech fäu am Platz. Handgschribe muess das si, o wes dermit nid würklech eifacher wird.

Itz schribsch druflos, wie s der grad i Sinn chunnt, geisch aues no mau düre, schtriichsch dür, probiersch es angers u fasch nomau vo voren a. Flicksch a der Formulierig ume, für dass de o würklech jede Satz e Gwinn isch. Irgendeinisch bisch de zimlech zfride u bringsch drei Site Gchribu am Schluss suber ufe nes früsches Papier. Chünigsblau uf Crèmewiss. Zwar gsehts guet us, aber wo s no einisch dürelisisch, merksch, dass das nid das isch, wo d eigentlech hesch wöue säge. Du verwuschisch auso itz das Blatt. Es landet im Papierchorb. Der Timer klimperet. Du luegsch uf d Uhr. Es isch füf ab zwöi. Genau.

Du hesch ke Zit verlore. Es isch e gschänkti Schtung sozsäge. Vergäbe isch si nid. Im Läbe gits nüt gratis. Oder nume säute.

Fahsch auso no mau vo voren a. U schribsch itz das, wo s z säge git. Bringsch aues suber ufe Punkt. När ligt das aues vor dir uf em Tisch u nümme lenger ufem Mage. U der Summer hinger der. So muess es si, itz chasch i ds Bett.

Hütt znacht, da chaschs nid besser. Aber hesch e zwöiti Chance. Das chunnt säute gnue vor.