Galerie

Es sig architektonisch gseh es chlises Meischterwärch, di nöii Galerie, hett si der Pressemitteilig entnoh. Totau i d Natur ipasst u im Iiklang mit der Landschaft. Usgfüehrt mit de modernschte Hiufsmittu u ganz ohni d Umwäut z belaschte. Vo der Dimänsion här chönn si sech zwar nid mit de ganz Grosse mässe, aber grad di unufgregti Bescheideheit machis us, dass dä Bou es richtigs Bijou sigi worde.

Söfu hett si verschtange vo däm italiänische Teggscht. U dass es e Füehrig gäbi, am haubi zwöufi, nach der offizieue Aschprach vom Kantonsrat Sowieso. Sogar e Bundesrätin sigi z Gascht bi dere Iweihig. Auso hetts würklech öppis Wichtigs müesse si. Es isch drum de o nid ds verschprochene Apero riche gsi, wo se bewoge hett, a dere Veraschtautig wöue derbi z si. Si hett scho ging öppis übrig gha für moderni Architektur, u wüu si sowieso isch ir Gägend gsi u a däm Sundig grad nüt Bessers im Sinn hett gha, hett si sech de a däm Morge bsungers Müeh gä mit ihrem Outfit. Ja, für ne Galeriebsuech muesch di scho chli useputze, hett si gfunge, u di rote Schtögis unger usem Schaft gnoh, die wo si so säute d Glägeheit hett gha, se z trage. U d Tämperature heis erloubt, dass es es churzes Röckli ta hett. Fasch wär si sech äxtra es nöis ga choufe. Aber das hett se de doch chli zviu tünkt. Si hett sech drum mit eme ne passende Täschli begnüegt u ere uffäuige Haarschpange. Nume schad, dass si i dere ganze Iiladig niene gfunge hett gha, wär de da eigentlech usschteut, i dere agseite Location. De hätt si sech im Vorfäud no chli chönne schlau mache, für de chönne mitzrede bim Smalltalk mit au dene prominänte Bsuecher, wo si dert erwartet hett.

Ufem Parkplatz si scho fei e chli viu Outo gschtange. I der Nechi aber wit u breit kener Hüser. So wit usse hätt si di Galerie itz würklech nid vermuetet. Si isch usgschtige u hett aui di Lüt gseh schtah – dert äne vor em Tunnuigang. Schnäu isch si wider zrugg i ds Outo gschtige, heizue gfahre u hett sech umzoge. U när di Amäudig gsuecht, die für dä Italiänischkurs.