Bei


Da hett eine sicher nüt Böses dänkt, won er isch ga wandere i das abglägne Tau hingere, wos so schtotzig isch, dass me gschider nid vom Wäg abchunnt. U glich isch es eso wit cho, dass dä im Waud es Bei hett gseh lige u drum d Polizei alarmiert hett.

Weder vo dere no vom Finder säuber hett me chönne vernäh, was de das genau für nes Bei isch gsi, es epilierts oder es muskulöses, u wie lang dass es äch da scho gläge sig. De faht me äbe a, sech das säuber uszmale – u hört zimlech schnäu wider uf dermit. Aber d Schpekulatione, wie das Bei i Waud heig söue cho si, hei kes Ändi gnoh. Vo Wöuf u Bäre isch da d Red gsi, sogar vo Adler, u uf de Fridhöf z ringsetum hett me gluegt, obs niene vilech es Loch heig, wos besser kes hätt söue ha. Bärgretter si zum Iisatz cho, u hei derbi ihres Läbe riskiert, sogar Toucher hei im nache Flussbett nach witere Körperteile gsuecht. Gfunge hei si nüt. So isch de das Bei mit der Zit fasch wider vergässe gange, wüu gfäut hetts nämlech niemerem.

Ersch, wos du nach öppe eme ne Monet hett e Namen übercho u nes übus Schicksau, hett me dert i däm Tau di Gschicht wider e chli necher a sech häre glah. U mi hett afa sammle für die Witwe, wo itze ke Ma meh hett gha – oder emu nume no eine mit eim Bei. Wüu der Räschte vo sim Körper, dä isch ging no niene gsi. Was eim säuber ja chli schtutzig gmacht hett, vor auem, wüu d Polizei ging no vome ne Unfau gtredt hett u vo wiude Tier. Nume, dass die ja de kener Schue hätte gfrässe oder öppe no der Rucksack. Säuber hett me itze auso ame ne Verbräche umegmacht. Öpper hett dä Ma, wo gar nid hie hätt söue si, ja vilech eifach zum Verschwinde bracht – u hett ne zweni töif verlochet, so dass di wiude Tier, wos hie tatsächlech git, zu me ne Bei si cho.

Aber äbe. Für ne rächte Krimi längt di Gschicht no lang nid, u füre churzsichtig Blick isch das Tau hie viu z wit ewäg vom Gscheh, für ne grossi Sach drus z mache. Abgseh dervo hett si ja o würklech zweni Fleisch am Chnoche u weder Hang no Fuess. Emu im übertragene Sinn.


© 2018 by stst