Profiu


Ihres Profiu, das weckt so viu vo sir Vergangeheit, u won är ihres Gsicht uf sim Händidisplay gseht schtrahle, isch är grad wider zwänzgi u sie no nid mau das, u glich isch sie ihm Liechtjahr wit vorus u er schtoglet hingerdri u louft ere nache, ohni dass sis würd merke. Är weiss, dass sie ihn nid mau gseht. Für seien isch är Luft – no nid mau das, wüu Luft würd sie ja bruche. Ihn aber brucht si nid. Si hett gnue angeri, wo re der Hof mache, u mit dene chan är sech nid mässe. Är mit sir Frisur, wo keni isch u dene Chleider won är chouft, wüu ihm d Mueter genau settegi würd choufe. Schliesslech wohnt är ja no deheim. Da muess er scho chli e Gattig mache. Är chönnt se auso nid emau zue sech heinäh, für ere chli necher z cho. Aber er wagt sech ja nid emau, se z frage, ob sie mit ihm chiem cho schpaziere.

Läck hett die ihm gfaue. Aber er cha re das ja nid eifach so säge. So schön wi die isch u so cool, mit au dene coole Tüpe, wo si mit ne umehanget u är, är cha no nid mau rouke ohni z hueschte. Oder Gitarre schpile oder e politischi Hautig verträtte. Nei, är isch es Bubi u himmlet sen a, aber nume im Verschteckte. Schribt ere i Gedanke hundert Liebesbriefe u schteut sech vor, wi das wär, wen er se würd küsse. Derbi hett er no nie eini küsst, eso, wien er sech vorschteut, er würdi seie küsse.

Sicher es haubs Jahr isch das eso gange u är hett glitte, bis si du wägzüglet isch u är se äntlech hett vergässe. Oder emu nümm duurend a se dänkt hett, wüu sin ihm us den Ouge isch. Vergässe hett er das Gsicht nämlech nie, wo zu dere Frou hett ghört, won är gärn aus Fründin hätt gha u nid gwüsst hett, wi me so öppis ageit.

U itz weckt ihres Profiu uf sim Händi so viu vo sir Vergangeheit, u aus isch wider da. Guet, o sie isch chli euter worde. Aber schön isch si no ging. Si gfaut ihm immer no wie ne More u das, wenigschtens das chan er ihre itze säge. Är läiket ihri Foto, u när geits ke Haubschtung, u de isch är o scho ihre Fründ. So schnäu cha das ga. We das nume früecher o so eifach wär gsi.