Aschluss


Einisch meh hett's nid glängt für ufe Böss. Dä isch scho lengschtens wäg gsi, wo der Zug äntlech acho isch. So, wi fasch jedes Mau uf dere Schtrecki. Nume, dass z nächschte Poschtouto hütt ersch i dreine Schtung wider fahrt. Si hett drum eifach es Taxi gno u sech di Fahrt, wo mit de ungfähr drühundert Kurve e Schtung u hundertdrissg Franke gchoschtet hett, vo de Schwitzerische Bahnbetriebe la zruggerschtatte.

Das sig de scho chli schpezieu u nes Entgägecho vo ihrer Site, hei die sech im Begleitschribe güsseret, so öppis wärdi de nume im Usnahmefau zaut.

Uf das abe hett si itzen aber gar nümm angers chönne, aus a di beträffendi Schteu e nätte Brief z richte, wo gschiuderet hett, dass di Verschpätige vo de Züg vom Norde i Süde u umgekehrt de bi witem nid en Usnahmefau sig, sondern eigentlech d Regu. Das Lied vo de Zugsusfäu, Schteuwärchschtörige u de Bahnhöf, wo der Zug ging scho abgfahren isch, isch ere so glöifig gsi, wi kes angers. Nid chönne verchlemme hett si sech ussertdäm, dass die Zugfahrt nüt gwunne heig dür d Tatsach, dass itz di auti Gotthardlinie neuerdings Panoramaschtrecki heissi. Das machi di Sach nämlech o nid unbedingt attraktiver.

Es hett du gar nid so lang duuret, isch de när en Antwort cho, mi sigi sech dere Problematik durchus bewusst u dranne, di Situation so schnäu wi müglech z verbessere. Sachlech hett me sech gäh u glich nüt gseit derbi. Däm doch ender trochne Schribe si aber no zwe Guetschine à je füf Franke für ne Konsumation im Schpiiswage bigläge, was se ja irgendwie no nätt hett dünkt.

Uf der nächschte Fahrt hett si du auso gratis Gaffee trunke. Oder si hetts emu gmeint. Wüu wo sie churz vor Bellinzona di Guetschine usem Portemonnaie nimmt u se am Chäuner entgägegschtreckt, meint dä, es tüeg ihm leid, aber di chönn er nid anäh. Das hätti sie scho bir Bschtelig müesse säge. Itz heig är scho tippet u so schtimmi de süsch si Abschluss nid. So hett si di Gaffee haut de zaut. Sim Abschluss zlieb.

Derfür hetts de mit em Aschluss dasmau klappet.