Schissdräck

We mes am Morge no nid so gseht oder eifach nid ufpasst, de chas passiere, dass me i so ne Marderdräck ine schteit, we me der erscht Schritt uf d Terasse use macht, für z luege, was äch ds Wätter machi u derbi no i Himu ufe luegt.

Wahrschinlech isch ä Marder so schtrukturiert, dass er dänkt - wenn er de überhoupt cha dänke - är müessi si Presänz marggiere. We me ne scho nie gsei am Tag, de müess me ne doch de wenigschtens schmöcke. U drum setzt är äuä siner Zeiche i der Nacht.

Nume bim erschte Mau fragt me sech när dinne, warum es äch itz unger einisch eso schtinki. U irgendwenn chumnt me de druf, es müessi äuä a de Finke lige, we dä Gruch eim nacheloufi i jedes Zimmer. Es ligt nid a de Finke, es chläbt dranne.

So probiert me itze das schwarze Würschtli, wo ab auem Umeloufe ganz flach isch worde u sech i ds Profiu vor Sole ine trückt hett, wider wäg z übercho. Ungerem Wasser, mit em Bürschtli, mit eme ne Zahnschtocher oder was me haut grad so schpitzigs ir Nechi hett. U am nächschte Morge luegt me besser. O am übernächschte. U när vergisst me's haut de o wider u dä Schisdräck passiert eim vo Zit zu Zit de auso wider.

Der Zuefau wott's, dass der aut Nachber eim bim Schueputze atrifft. Är kenni das Problem guet. Nume müess me haut eifach mit Wasser gfüuti Petfläsche vor d Türe schteue. Das hauti d Marder dervo ab, eim vor d Türe z schisse. So erfahrt me auso ohni derna gfragt zha, was di eigenartigi Deko vor de Hustüre u uf de Fänschtersimse söui.

Es funktioniert aber tatsächlech. Der Marder nimmt bi sire Gschäftstätigkeit Abschtang vo däm Bodetecheli.

We mes itz am Morge auso no nid so gseht oder eifach nid ufpasst, de chas passiere, dass me de über so ne Petfläsche schtoglet, we me der erscht Schritt uf d Terasse use macht, für z luege, was äch ds Wätter machi u derbi no i Himu ufe luegt. De chas si, dass me sech e Fuess verträit oder ds Chnöi ufschürft, wüu me ds Gliichgwicht verlürt u umgheit. Da isch eim de doch der Marderdräck am Finke no lieber. Dä tuet wenigschtens nid weh.