Tankschteu


Är trinkt der Cappuccino ohni Gaggopulver, was eim scho chli komisch dünkt. Wüu e Cappuccino ohni Gaggopulver doch im Grund gno nüt angers isch aus e Schale. U derbi mache si hie so ungfähr di beschte Cappuccini, wo me sech cha vorschteue. Nid so settigi mit luftigem Miuchschuum, wo i sech zämegheit, sobau si ds Schoggipulver drüber schtröie. D Miuch isch cremig u blibt das o, we me chli im Tassli rüert. Der Gaggo, dä chunnt unger dra, so, dass der Gaffe e bitter-schoggigi Note überchunnt u zwar nid nume grad ar Oberflechi.

U wo me du wider einisch da a dere Tankschteu hocket u si eim di bschteute Getränk särviere, ihm eine ohni, eim säuber e Cappuccino, so wies üblech isch, meint är, das sig scho ne tolle Ort hie, o we's ja numen e Tankschteu sig.

Hie sigs haut eifach pärsönlech. Mi kenni enang u grüessi, wächsli öppe eis zwöi Wort vor der Arbeit. Hie heig är mängisch fasch e chli z Gfüeu, deheime z si, o wes ja nid würklech gmüetlech sig a dere breite, lute Schtrass. Aber grad drum heigs ja äuä o chum Frömdi, di hocki lieber däne uf der Piazza, wo der Cappuccino tüürer u ersch no so viu schlechter sig. So mit süessem Schoggipulver ufem Miuchschuum, wo sig wi dä vom Abwäschmittu. So mit grosse, luftige Blattere, wo grad i sich zäme gheii, chuum schteck me ds Löffeli i ds Tassli. Dä Cappuccino hie, das sig de würklech öppis angers.

Mi lost ihm so zue u wagt de schliesslech z frage, warum är de ke Gaggo i sim Cappuccino wöugi. Der Miuchschuum, das sig ja ds einte, aber i ne richtige Cappuccino ghöri doch eifach Gaggopulver.

Das sig äbe so ne Sach, meint de är drufabe. Är sig ja ganz genau mir Meinig. Mi heig ihm einisch – das sig sicher itze fasch zwöi Jahr här – e Cappuccino ohni Gaggo bracht. Är heigi denn nid gwagt z widerschpräche, so nätt wi men ihm dä särviert heig. Mit eme ne Lächle u so, aus wär's e Schpeziauafertigung, äxtra für ihn. Sider kenni me ihn aus dä mit em Cappuccino ohni Gaggo. U irgendwie dünki ihn das äbe no schön.


© 2018 by stst