Ferie


Ob är no chli Wasser wöugi, hett si ihn gfragt, u är, grad mit em Mu vou Sändwich hett nume der Chopf gschüttlet u de när, won er äntlech gschlückt hett gha, gseit, nei danke, aber das sig schampar lieb, wi si so zu ihm luegi. Si sig überhoupt di beschti Frou vo aune. När isches wider schtiu gsi, u si si näbe nang ghocket, bis sie du äntlech wider öppis gseit hett. Aber das Mau isch es nid um ds Ässe gange.

Si heigi eifach mängisch z Gfüeu, es sig nümm eso, wie früecher. Är wüssis ja, söfu wien är ungerwägs sig u si so viu eleini u überhoupt, si wüssi mängisch gar nümm rächt, was si eigentlech no wöugi. Är hett itz wider müesse schlücke, das Mau aber läär. U wär natürlech am liebschte eifach ufgschtange u gange. So wie ging bi settige Diskussione. Nume dass er das i sire Situation nid guet hett chönne u drum i ds Rächtfertige ine cho isch, u sie müessi das doch o e chli verschtah, är mit sim Gschäft u auem, da chönn me eifach nid ging grad so, wie me am liebschte möchti.

Si hett ihm du wyter verzeut, wien es ihre eso geit mit ihm. Natürlech hett si afa gränne, u är isch verruckt worde. Si si chli giftig worde, hei nang agschwige, u när hett är du wider igränkt. Aber das nid grad sofort. Settigs brucht haut eifach Zyt. Är hett ihri Hang gnoh u se gfragt, was sie sech de eigentlech genau vorschteui.

Si hett das zwar nid rächt chönne formuliere, vilech, wüu sis eifach o nid würklech gwüsst hett. U so isch das itz wider hin u här. Si hei nang verzeut, was sie so würd erwarte vo däm Läbe u von enang. Mängisch unger Träne u mängisch zimlech vorwurfsvou. Mit der Zyt de o wider versöhnlech u zmittsdrin hett si de wider Öpfle uspackt oder es Päckli Güezi. Sogar Gaffee hett si i re Thermosfläsche derbi gha.

Nach öppe vierne Schtung si si nang du i den Arme gläge u hei gwüsst, was si vo nang söue haute u was si a nang hei. U am Radio hett di nätti Frou einisch meh d Verchersmäudige düregä u öppis gredt vo Zytverluscht. Zytverluscht?, hett si itz glachet. Ihre chöms grad vor, aus hätti si es ganzes Läbe gwunne. När si si zäme dür das Tunäu gfahre u hei sech gfröit uf ihrer Ferie.