Goalie


De hei si wider zäme Schutte gluegt am Abe, u si hett Italie ghoufe, so wi sider Jahre. Wüu si äbe irgendwo düre gliich zimlech e tröii Seeu isch gsi u konschtant uf ihrer Linie, wo si irgendeinisch igschlage hett gha, ohni hütt no z wüsse, warum, isch blibe. U natürlech wägem Buffon. Dä hett si der sympatischt gfunge vo au dene Schütteler – u mit Abschtang o der Schönscht. Was hätt e Frou i ihrem Auter o für so ne junge Schnuufer wi bischpiuswiis e Summer chönne fäne. Guet, er wär o Goalie gsi. Aber dä hätt ja ihre Suhn chönne si, u das hätt se de irgendwo düre scho chli komisch tünkt.

Är hingäge isch für di Dütsche gsi. Meh wahrschinlech,für dass uf ihrem Sofa so öppis wi nes Gliichgwicht gwahrt isch gsi. Irgendwie fieberet sech's schliesslech o chli besser, we me ungerschidlech Partei ergrift. Es git de no chli meh Schpannig i der Wohnschtube. Nid, dass si zwöi das hätte brucht, aber ds Schpiu, das hetts bitter nötig gha. Das hett sech nämlech zimlech i d Lengi zoge.

Letschtlech geit's bim Schutte ja um d Gou, u we's kener git, so isch das de irgend einisch e zimlech längwilegi Aglägeheit. Aber tapfer hei si's dürezoge, nid nume die ufem Rase, nei, o si zwöi. Obschon si am Morge früeh de wider hei use müesse u scho i der Verlengerig gwüsst hei gha, dass das es herts Ufschtah wird wärde am nächschte Tag. Aber äbe, der Buffon hett's ihre ata u si hett ne itz, i dere letschte Phase ja schlächt eifach chönne im Schtich lah, während är uf der dütsche Site bliben isch. So hei si das dürezoge.

Si hett du müesse mitverfouge, wi ihrem Goalie di Penoutis um d Ohre gfloge si. Am angere isches ja nid besser gange. Aber äbe glich e chli.

So z verlüüre isch nüt Schöns. Aber o der Sieg hett ihm nid würklech Fröid gmacht. Uf das abe hei si no der Wii ustrunke u si de schpeter zimlech unbefridiget ga Zäng putze. Zum Glück hei aber beidi gwüsst, dass es ja no angers git aus Schutte. So isch es de haut no einisch e chli schpeter worde.