Fritz

Wo me das Hus hie übernoh hett, hett me sech zwar vo dene Möbu, wo no dinne gschtange si, chönne dischtanziere, nid aber vo der Chatz, wo hie zum Inventar hett ghört. Nid nume vom Hus, sondern vom ganze Dörfli. Dä rot Moudi isch nämlech bi aune ii und us, aus wär er überau deheime. Bi teune isch er lieber gsi. Es isch e Frag vom Ässe gsi, wo men ihm särviert hett.

Säuber hett me ne nid gfueteret. Feiss gnue isch er nämlech gsi. U gliich isch er hüüfig z Bsuech cho. Es hett öppis angers müesse si, won ihm hie gfaue hett. Wahrschinlech der bequem Schtueu mit em Schaffäli. Uf dä hett er sech niderglah, nachdäm er eim es Zytli um d Bei gschtrichen isch, u we me säuber gärn uf dä wär ghocket, chli vor ds Füür am Abe, de hett er eim mit de Chraue zeigt, wäm dass dä Platz ghört.

We me sis eigete Revier auso hett wöue verteidige u ne vor d Türe schteue, hett me d Gartehäntsche müesse füre näh. Das hett er eim aber nid übu gnoh. Im Gägeteu.

Üsserscht dankbar hett är sech zeigt u das mit chliine Gschänk bekundet. So isch de öppen einisch en agchättschete Frösch am Morge vor der Türe gläge oder e toti Muus. Säute o nes Vögeli u de hett de das mit de Sibeschläfer agfange.

Z erschte Mau isch's nume ne Schwanz gsi, e chliine, graue, buschige. Churz drufabe hett me di ganzi hingeri Häufti übercho, mängisch de o di vorderi. E ganze hett er nie bracht. Aber wenigschtens isch är bereit gsi, mit eim z teile.

Wo me so nes Tierli de äntlech mau hett läbig z Gsicht überscho, hett's eim de tuuret u afa leid tue um di luschtige Kreatürli mit dene schöne grossen Ouge.

Aber das Mitleid isch eim schnäu wider vergange. Wo si du nämlech ungerem eigete Dach zmitts i der Nacht hei afa Boccia schpile mit de Hasunüss, u derzue o no ganz fürchterlech quitschet hei, ohne sech drum z kümmere, dass nid aui Gschöpf am Tag tüe schlafe, hett me der Natur de no so gärn ihre Louf glah u der Moudi la fah, was er verwütscht hett. U sech natürlech o erkenntlech zeigt. Mi hett e zwöite Schtueu gchouft u no einisch es Schaffäu. Sider hocket me am Abe nümm eleini vor em Füür.