Bouschteu


Das sig scho läschtig mit dere Bouerei da i sim Nachberhus, verzeut der Kolleg, wo me voletscht zäme duss im Garte ghocket isch. Si Baukon mög är ja scho gar nümm putze, das bring ja gar nüt, u das grad itze, wo me doch äntlech am Abe gmüetlech chönnt vorusse hocke. U won er de Afangs Wuche heig wöue d Feuläde zuetue im Schlafzimmer, für dass d Sunne am früeche Abe nümm so inebrännti, heig er gmerkt, dass das ja gar nid göngi wägem Grüscht, wo grad schüsst vor sim Feulade ufhört.

Das heig er de o zu sire Nachbarin gseit, won er se am Tag druf vor ihrem Briefchaschte hett gseh nusche. Är sig ja süsch nid eine, wo sech tüeg beschwäre, aber was z viu sig, sig haut eifach z viu.

Si sig zimlech ruhig blibe, trotz sim doch wahrschinlech ender e chli unghoblete Tonfau. Für seie sig das o nid grad eifach, mit dene Arbeiter duurend vor ihrne Fänschter. Är heig de zue re gmeint, si heig aber emu de schliesslech öppis vo dere ganze Bouerei. E grösseri Wohnig u nöii Fänschter, u d Terrasse, wo si itze grad am mache sig, gsei doch, so wie är das gsei, totau schön u amächelig us.

Är hingäge heigi nüt aus der Lärme, der Schtoub u der ganz Dräck, wo de am Schluss är säuber müessi putze.

Är dörfi gärn emau cho luege, seit si drufabe. Vo däm här lohni sech e so ne Umbou scho, obschon si re mit der Mieti natürlech de chli ufe gienge. Ds Bad u d Chuchi sig o nöi. Si wüss ja fasch nid, was me mit au dene Grät da chönni mache, wo si re früsch ibout heige.

Für ihn wär das gar kes Problem, meint är zu ihre, wo si de churz druf vor däm Steamer schtöh. So eine hätti är scho lang gärn gha.

Es paar Täg schpeter hett är ihre du när zeigt, was me mit däm so aues z Schtang bringt. Si si zwüsche Sagexplatte u Zimäntseck uf der haub fertige Terrasse ghocket, u di Bouschteu hett se nütt me witers gschtört, won är ihre das Viergangmenu uftischet hett. Si hett derzue e guete Wi särviert. No vor em Dessär hett si ihm när ds Schlafzimmer zeigt u är isch de blibe bis am nächschte Morge.

Sider hett er nie me gseit, ihn schtör di Bouerei im Nachberhus.


© 2018 by stst