Banane

I zäh Minute fahrt der Zug u gässe hett me ging no nüt. Di grossi Haue isch vou Lütt. Mi luegt, wo d Schlange nid so läng isch. Am Brätzuschtang gsehts nid schlächt us. Vier Lütt u zwöi, wo tüe bediene. Das chönnti länge, fingt me nachem schnäue Blick uf d Uhr.

Di jungi Frou vor eim hett e Zwefränkler ir Hang. Was äch so ne Butterbrätzu choschti, fragt si d Verchöiferin dür ds Fänschter. Vo inne här schmöckts verlockend nach früsch Bachnigem u ds Wasser louft eim scho ab auem Aschtah im Mu zäme.

Vieri zwänzg, seit die, u d Frou, di jungi, mit de länge Rastazöpf, luegt enttüscht uf ihri Hang mit dere einzige Münze.

U de ä Banane?

Eis nünzg, tönt's vo innen use.

Das sig itz aber o no tür für ne einzigi Banane, meint si nume u träit sech um.

Si söu doch warte, rüeft da der Verchöifer, wo dernäbe öpper angers hett bedient gha. Är schtreckt ere e Brätzu use. Si chönn dä ha. Es sig es Gschänk.

Es dankbars Schtrahle breitet sech itz uf dam schöne Gsicht us. So richtig eis vo inne use.

Merci!, seit si, u hett scho e Biis gno, bevor si der erscht Schritt uf d Site macht.

Säuber bschteut me itz o ne Brätzu. U derzue no e Banane. Irgendwie isch der Gluscht doch grösser, aus der Widerschtang vor em überrissne Priis.

Nid z tüür?, fragt da d Verchöiffere mit eme ne Ougezwinkere. Si meint's nid bös u glich hett me plötzlech so nes komisches Gfüeu, wüu's teu vermöge u teu nid – u me säuber zum erschte Teu ghört.

Was söu's, dänkt me de aber mit em ne Chopfschüttle u nimmt es Nötli usem Portemonnaie. U si leit eim itze siner Sache uf d Theke. Ds Seckli mit em Brätzu u zwo Banane. Mi heig doch o nes Gschänkli z guet. So härzig, ihri Scheste. Mi hätt itz gärn es Trinkgäut gä. Doch wär de dermit das mit em Gschänkli scho grad wider begliche gsi. Drum hett me's du lah si. Ganz i Gedanke louft me itz dür ds Gschtungg, bis eim eine blöd verbi chunnt.

Ob men ihm nid zwe Schtutz heig. Är bruchi öppis z Ässe. E Banane chönn er ha, git men ihm zur Antwort u nuschet scho ir Täsche.

Das sig itz aber ono biuig, meint itz dä u laht eim schtah.