Blüemli

D Drögeler bruchi ihres Res Bull u ihrer Zigarette, seit di Frou im Tram zu ihrem Ma. U dass di Verande ihre äbe so guet gfaui. Wi das blüeii da i dene Vorgärte, u das zmitts i dere grosse Schtadt. Hingerenang hocke si, u d Hüser a der Schtrass, d Läde u der Kiosk zieh am Fänschter a ihne verbi. No nid viu Lütt si ungerwägs. Nid viu meh aus e Hundebsitzer, wo am Boum druf wartet, dass der Hung äntlech sis Gschäft macht u ne Joggerin u äbe die, wo ihres Red Bull u ihrer Zigarette bruche. U di paar im Tram, wo nes angers Ziu hei. Es isch e Sundimorge, öppis vor de Zähne.

Si hei di schöne Chleider anne, u no nid lang isch's äuä här, dass der Ma mit em Schträu dür siner wisse, nasse Haar isch, schön vo vore gäge hingere. Exakti gradi Linie zieh sech über si Chopf. Si nuschet itz es Päckli Papiernastüechli usem Täschli u schtreckt ihm eis dervo hingere. Ab der früsche Morgeluft hanget ihm e Tropf ar Nase. Wi sie das gseh hett, isch eim es Rätsu.

So wi me säuber, schtige o si ar zwöitletschte Hautschteu us. Chli uschlüssig luege si ume, u wo ds Tram du wyter gfahren isch, wei si über d Schtrass uf di angeri Siten übere wächsle. De mache si das de aber glich nid. Irgend öppis macht se schtutzig.

Dass itz dä Bluemelade emu o müess zue si. Itz heig me nid emau es Blüemli für ds Fridi. Für ihns, wo doch der Früelig ging so gärn heig gha, seit si zu ihm. De hätt me äbe glich am Kiosk verbi söue, meint itz är. So hätt me wenigschtens es Schoggelädli chönne mitbringe.

Der Kiosk sig äbe nid nume für d Drögeler, hätt me itze gärn zue ne gseit. Oder aber, dass ds Fridi doch so Zucker heig. Oder no schlimmer: Ds Fridi heig überhoupt nid gärn, we mes bsuechi im Schpitau, weder mit Blüemli no mit Schoggola.

Mi hetts du aber gliich nid gmacht. Schliesslech isch ja Sundimorge, u denn söu d Wäut ja bekanntlech no ir Ornig si. Emu für eim säuber isch das eso. Wüu me nämlech siner Zigarette scho vorem Iischtige gchouft hett. Wenn o ohni Red Bull. Aber mi isch ja schliesslech o ke Drögeler.