Choche

Hütt am Abe hei si Gescht. U der Ma, dä schteit ir Chuchi. U das scho sider am Mittag. Wo si gärn es Gaffee wett, schickt er se wider use. Är mache re de grad eis. Us däm isch aber de nüt worde.

Am Morge früeh isch är bereits gsi ga kömerle. Ufe Märit, zum Metzger u weiss der Herr, wohi no aus; es hett emu Schtunge duuret, bis er wider zrugg isch gsi.

Normalerwys chochet ja d Frou. We's eifach so um ds Ässe geit. De git's Gmües u Fleisch u Biilag. Zu schpezieue Glägeheite aber chochet är, der Ma. U de git's e Komposition. Für die bruuchts au di Grät, wo si nie bruucht. Die, wo i der Chuchi öppe zwe Drittu vom Platz i de Schäftli belege. Tämperaturmässer, Mässer mit schpezieuer Klinge, Mörser, Mixer, Rüerer u Gfäss, wo use me ne Labor chönnte schtamme. Bunsebrönnerli u Vakumiergrät, Pinsle, Sibli u settigs, wo si ke Name hett derfür.

Es glingt im guet, sis Znacht, das muess si zuegäh. U d Gescht hei sech nid zrugg mit Komplimänt. Doch när föh d Manne a u fachsimple über Gartämperature u Konsischtänz vom Eiwiss. Wi me d Rüebli macht, so dass si knackig blibe u de glich richtig ling wärde. Dass nume es glücklechs Tier, wo sanft isch gmetzget worde, zarts Fleisch git u ne Chäs di richtegi Fermentationsschtuefe mues erreicht ha.

Nachem Sorbet – är heig sech voletscht e nöii Glacemaschine gleischtet, wie der Ma schtouz verzeut – si de emu aui satt u glücklech u mi fingt, das chönn me guet wider einisch widerhole, so ne gmüetlechen Abe. Vilech miech me aber de eifach es Raclette, meint da d Frou.

Ou, da wüss är de ä Chäserei im Nachberdorf, macht itz der Gascht. Nume dä heig dä Chäs, wo so schön rezänt sig u genau di richtegi Riifi heig u nid grad gummig wärdi ufem Täuer, so wi aui angere, wo me überau chönn choufe. Da müess me de äbe scho druf luege. U Härdöpfu chönn me de da o nid irgend e Sorte näh.

D Froue wächsle da derbi numen e churze Blick. U göh am Abe druf zäme i d Pizzeria i der Nechi. Dert rede si über das, wo si geschter nid si derzue cho. Über aues, nume nid über ds Ässe.