Vorsätz

Är hett da die Doku gseh vo dene Söi, wo unger soumässige Bedingige nüt angers hei z tüe gha, aus dick z wärde, für dass me se, we si de nach müglechscht churzer Zit so wit si gsi, hett chönne metzge. U das unger ungloublech himutruurige Umschtäng. Di männleche Söili hett me vorhär no unger unsägleche Quale kaschtriert. Är hett o gwüsst, dass aui die Tier, wo nume uf der Wäut si, für dass me se de früecher oder schpeter cha ässe, söfu frässe, dass me dermit di ganzi Wäut chönnti fuetere. Oder emu aui Mönsche. A dene Gas, wo di Viecher ussertdäm produziere, hett er gar nid möge umeschtudiere. U dass me di chline Legehüendli-Buebebibeli tonnewis umbringt, wüu ne zweni schnäu u zweni grossi Pouletbrüschtli wachse, das hett er o scho ghört gha. Meh hett er gar nid wöue wüsse. Mi chönnt o eifach e chli weniger Fleisch ässe, hett er wäge däm auem du ungereinisch gfunge. U Fleisch chönn me ja, we me de würklech Luscht uf e ne schöne Bitz heigi, settigs choufe, wo me wüssi, dass der Schpänder es einigermasse glücklechs Läbe heigi gha u weder mit Hormon no mit Tiermäu sigi gfueteret worde u ersch no heig voruse dörfe, ga Gras frässe u umerenne.

Är hett scho am nächschte Tag es Filet heibrunge, vakuumiert u weder vom Metzger no vom Puur. Es sig äbe grad so günschtig gsi. U der Schpäck ungerem Schpieguei hett er plötzlech gar nümm wöue misse. Es hett ke Tag gäh ohni Fleisch, der Tofu, won er gchouft hett gha, isch de irgend einisch abglüffe. O ds Chochbuech, wo sie ihm äxtra isch ga choufe, isch irgendwo ufe me Tablar obe verschtoubet. Es isch bir guete Absicht blibe, u mit em schlächte Gwüsse isch o d Luscht uf Fleischlechs schtetig grösser worde. Äs isch äbe nid so eifach gsi, mit dene guete Vorsätz. Das hett o sie gwüsst u drum nid gross öppis dergliche ta, won är hett la verlute, mi chönnt ja eigentlech chli weniger Outo fahre u nes ungrads Mau der Zug näh. Das hett sie nid kommentiert u eigentlech itz nume no druf gwartet, das är ihre ir nächschte Zit e Probefahrt mit sim Troumouto vorschlaht.