Zwätschge


Mi hett so gar e ke Luscht gha uf dä Zwätschgechueche, wo d Kollegin äxtra bache hett. Si heig no so viu Zwätschge i der Gfrüüri, u scho sig di nöie nache. Äbe, hett me tänkt, u aus isch eim wider z Sinn cho. Nid jedi Chindheitserinnerig hett äbe ds Potenziau derzue, e gueti z si.

D Zwätschge sig de wider nache. Meh hetts nid brucht, für das aui zäme när e Wuche lang uf de Leitere si umeturnet u di riife Frücht ab däm aute Boum hei abeghout. Oder emu fasch aui zäme. Der Grossvatter, dä, wo di Nachricht ging pärsönlech hett überbracht, isch nämlech am Boden unger gschtange u hett sini Truppe dirigiert. Nid, dass me irgendwo dert oben öppe no e Frucht vergässe hätt. Hür heigs wider bsungers viu, hett er de gmacht, totau schtouz u mit de Häng i de Hoseseck. O der Vatter hett sech nid beteiliget, a dere Abläserei. Är isch i ds Büro. Nid lieber, aber zwungenermasse. Aber är hetts guet gha so, hett me säuber tänkt, hett er doch di Zwätschge chönne la Zwätschge si.

Je riifer d Frücht am Boum si worde, deschto bsoffener si o d Wäschpi gsi. Auso hett me besser fürschi gmacht bim Abläse, u we de das Böimli äntlech läär isch gsi, ischs de das aber no lang nid gsi. Di Zwätschge hett me chörbwis heigno, se gwäsche u grüschtet. U itze sines d Würm gsi, wo me hett müessen es Oug druf ha.

Es hett de Zwätschgechueche gä. Götterschpis u Fotzuschnitte. Kompott hett d Muetter gchochet u Gomfitüre, obschons im Chäuer ging no Gleser vo färn u vorfärn gha hett. De hett si o no kilowis Zwätschge i Rum oder Essig iigleit. Zwätschge mit Zucker, Zwätschge mit Zimet, settegi mit Schpäck o no mit Glace. Zum Znüni hett es Zwätschge gä u o zum Zvieri. Sogar im Brate hett es Zwätschge gha, ds ganze Hus hett nume no nach Zwätschge gschmöckt. Ds eigete Verhäutnis zu de Zwätschge isch auso nid ganz unproblematisch gsi, u das hett sech bis hütt nid gross veränderet. Chirschi si eim nämlech viu lieber gsi u sis no ging. Was zimli sicher ganz angers wär, wär i Grossvatters Hoschtet e Chirschiboum gschtange.